Kon HAP ta traha
Bon biní na Huisartsenpost Curaçao - bo punto sentral pa kuido médiko urgente serka dòkternan di kas durante oranan di anochi, mardugá, wikènt i riba dianan di fiesta nashonal. Nos ta komprometé na ofresé asistensia médiko urgente di kalidat haltu i aksesibel, netamente na e momentu ku mas mester.
Huisartsenpost Curaçao (HAP) ta solamente pa kuido médiko urgente!
Nos ta pará kla pa atendé kasonan urgente durante oranan di anochi i mardugá entre 5:00 PM i 8:00 AM, 24 ora den wikènt i riba dianan di fiesta nashonal. Den kaso di problemanan médiko regular i heridanan chikitu, bo mes lo por atendé ku esakinan. No ta nesesario pa bishitá nos pòst di emergensia pa tipo di kasonan akí. Nos fasilidat ta destiná solamente pa kuido agudo serka dòkternan di kas ku no por warda te ku e siguiente dia di trabou.
Ki ora por tuma kontakto ku HAP?
Nos fasilidat ta destiná solamente pa kuido médiko agudo ku no por warda te e siguiente dia di trabou. Bo tin duda? Tuma kontakto tòg ku nos. Nos ta habrí di 5 PM te ku 8 AM riba dianan di trabou, 24 ora pa dia den wikènt i riba dianan di fiesta nashonal. Yama 9252 (grátis).
Triage: Triage ta enserá ku asistentenan di dòkter diplomá ta hasi preguntanan na e pashènt pa di e forma akí determiná si e kaso ta unu di urgensia médiko. Pa medio di un triage nos ta evaluá si ta konsiderá e situashon komo unu agudo i nos determiná tambe e urgensia. Por sosodé ku no ta klasifiká bo situashon komo unu urgente, pero e asistente di dòkter por asistí si dunando konseho tokante kiko bo por hasi mientras ku bo ta warda riba e sita ku bo dòkter di kas.
Semper ku sita serka HAP
Un sita ta obligatorio: Yama 9252 (grátis) pa asina planeá bo konsulta urgente. Bo no por kana drenta Huisartsenpost Curaçao (HAP) sin un sita. Lo habri porta solamente den kaso ku bo tin un sita.
Diferensia entre emergensia i urgensia
Den mundu médiko ta importante pa hasi distinshon entre ‘emergensia’ i ‘urgensia’. E distinshon akí ta yuda den desishon di kuido mas adekuá pa kada pashènt, dependiendo di su situashon spesífiko.
Emergensia
Ta klasifiká situashonnan komo ‘emergensia’, na momentu ku nan ta rekerí atenshon médiko pasobra nan ta forma peliger pa bida òf ta kontené riesgonan severo pa salú. Den kasonan di emergensia ta eksistí peligernan agudo pa salu òf bida di e pashènt. Esakinan ta keda tratá na Spoedeisende Hulp (SEH) di un hospital, na unda ku tin timnan médiko spesialisá disponibel.
Ehèmpelnan di situashon di emergensia:
-
Ataka di kurason: un situashon agudo na unda ku di repente e transporte di sanger pa e kurason ta keda blòkiá.
-
Aksidentenan grave: manera un aksidente di outo ku heridanan grave, por ehèmpel wesunan kibrá òf bludumentu grave.
-
Atake selebral: na unda ku e transporte di sanger na un parti di e selebre ta keda interumpí òf limitá ku por kousa dañonan permanente.
-
Heridanan grave: ku mester di asistensia médiko direkto.
-
Asfiksiá/Sofoká: un situashon peligroso ku ta eksigí intervenshon inmediato.
Urgente
Problemanan médiko ku ta konsiderá ‘urgente’, naturalmente mester keda atendé lihé pero generalmente no ta peligroso. Kasonan urgente no ta forma peliger pa bida direktamente, pero si ta eksigí yudansa médiko urgente pa evitá dañonan severo.
Den mayoria di e kasonan akí, dòkter di kas di e pashènt ta atendé ku esaki òf un ‘Huisartsenpost’ den oranan di anochi, mardugá, wikènt i riba dianan di fiesta nashonal.
Ehèmpelnan di situashon urgente:
-
Doló di garganta grave: por sinti inkómodo i por ta un señal di infekshon ku ta rekerí tratamentu.
-
Kentura haltu: spesialmente si e ta kompañá pa síntomanan di kansansio i rebultashon (uitslag).
-
Doló ora di uriná: por ta señal di infekshon urinario òf otro problemanan ku tin mester di asistensia.
Pa resumí: kasonan di emergensia ta rekerí tratamentu médiko inmediato na un sitio spesialisá manera Spoedeisende Hulp, pa motibu di e riesgo grandi di daño òf morto. Kasonan urgente mester keda atendé lihé, pero den mayoria kaso no ta peligroso i por risibí tratamentu pues serka un dòkter di kas òf ‘Huisartsenpost’ durante oranan di anochi, mardugá, wikènt i riba dianan di fiesta nashonal.
Keho i feedback
Komo pashènt di Huisartsenpost Curaçao, bo satisfakshon ta di prioridat haltu pa nos. Den kaso ku nos servisio no a kumpli ku bo espektativanan, nos lo apresiá si bo por laga nos sa esaki. Bo opinion ta esensial pa mehorashon kontinuo di nos kuido. Por fabor yena e formulario di keho dunando nos un splikashon di bo keho den un forma kla, inkluso dato(nan) relevante di esnan konserní huntu ku bo informashonnan di kontakto. Nos ta apresiá bo sinseridat i ta garantisá un tratamentu kouteloso di bo keho.
Feedback?
Nos ta invitá bo kordialmente pa kompartí bo feedback, sugerensia i kòmplimèntnan ku nos via di e formulario akí. Bo perspektiva ta esensial den nos dedikashon pa kontinuamente mehorá nos servisionan.
