Reakshon Huisartsenpost (HAP) riba opinion preliminar di FTAC

Komunikado di prensa

Na Ougùstùs 2024 un grupo di ocho dòkter di kas, ku no ta registrá serka Huisartsenpost (HAP), a entregá un keho kontra HAP serka e organisashon ‘Fair Trade Authority Curaçao (FTAC)’. E keho ta trata un kondishon den e akuerdo di registrashon (aansluitingovereenkomst) di HAP, ku ta obligá dòkternan di kas hasi uso di e sistema di informashon médiko (HIS) di SQLapius pa por haña akseso na servisionan di HAP. Mientrastantu FTAC a formulá un orden preliminar.

Promé ku HAP a kuminsá na Yanüari 2024, mas ku 90% di dòkternan di kas na Kòrsou tabata hasi uso di e sistema di informashon ‘SQLapius’. Mientrastantu botikanan, laboratorionan, SVB i CMC ta konektá riba e sistema aki. Komo ku e sistema ya tin hopi aseptashon, ta traha bon, ta pagabel i a permití un bon interkambio di informashon di pashènt entre e dòkter di kas i HAP, a disidí na lantamentu di HAP, pa HAP tambe hasi uso di e sistema di SQLapius. 

Pa HAP por atendé e pashèntan ku mèldu di un forma adekuá, ta di sumo importansia pa personal médiko di HAP tin akseso na informashon médiko di e pashènt, - manera su historia médiko relevante, informashon di alergianan i uso di remedi-, for di su fail elektróniko di su dokter di kas. Banda di esei ta esensial ku despues ku un pashènt keda atendé serka HAP, su propio dòkter di kas risibí informashon di esaki mas lihé posibel via un sistema digitalisá ku ta sigurá i konfiabel.  Di e forma aki e dòkter ta keda semper na altura di último desaroyo médiko di su pashènt. 

Pa e motibu aki, ora a lanta HAP, a pone uso di e sistema di informashon SQLapius komo kondishon den e akuerdo di registrashon pa dòkternan di kas por traha huntu ku HAP. E keho na FTAC a wòrdu entregá dor di ocho dòkter di kas ku no tabata hasi uso di SQLapius i ku no kier a bai hasi uso di e sistema aki. Kuater di nan, tabatin nan propio sistema di informashon. E otro kuater dòkternan aki no ta usa un sistema digitalisá pa warda informashon di pashènt, i ainda ta traha ku pèn i papel. Ku e grupo aki, no ta posibel pa krea interkambio elektróniko di informashon di pashènt, lokual ta un eksigensia inkondishonal pa por traha huntu ku HAP. Esaki a keda konfirmá tambe pa Inspekshon di Salubridat den un karta ku a bai pa dòkternan di kas na 2024. 

Den promé mitar di 2024, HAP a tuma kontakto ku dòkternan di kas ku ta hasi uso di un propio sistema alternativo, pa por eksplorá kon por konektá nan ku e sistema SQLapius. Sinembargo pa por konektá un sistema di informashon alternativo na SQLapius tin dos konsekuensia esensial. Na di promé lugá, esaki ta eksigí un adaptashon na SQLapius i alabes na e otro banda di HAP, pa asina e sistemanan di otro provedornan tambe por keda konektá. E adaptashon aki a keda realisá pa un gran parti kaba for di 2024, lokual a hasi ku ta téknikamente posibel pa interkambiá informashon entre SQLapius i otro sistemanan di informashon di dòkternan di kas. 

Na di dos lugá, e dòkternan di kas en kestion mester laga traha un konekshon API riba nan propio gastu. Un konekshon API ta un ‘interface’ digital ku ta hasi komunikashon i interkambio di informashon entre dos sistema di software posibel. Pa kada sistema di informashon alternativo, mester traha un konekshon-API apart, pa konektá esaki riba SQLapius. Trahamentu di e konekshon aki generalmente, ta algu kostoso. 

E dòkternan di kas en kestion, no tabata dispuesto pa karga e gastunan pa kubri nan konekshon i a spera ku HAP lo a sòru pa esaki. Esaki lo a nifiká ku HAP riba su gastu, lo mester a laga traha un ‘interface’ pa kada dòkter di kas ku tin un otro sistema ku no ta SQLapius. Segun HAP e punto di salida aki no ta rasonabel ni finansieramente faktibel. Ademas uso di un sistema di informashon alternativo por kousa posibel komplikashonan: ora e un dòkter di kas no tei, e dòkternan ku ta remplasé mester por traha ku e sistema spesífiko ku e tin i ku nan no konosé. Esaki por trese komplikashon ora hasi uso di remplasante. 

Otro punto ta ku  – fuera di e posibilidatnan tékniko pa por traha huntu ku HAP – ta un eksigensia tambe ku ‘file’ elektróniko di pashènt e asina yamá ‘patiëntendossier’ (EPD) di un dòkter di kas ku tin su propio sistema di informashon, mester kumpli ku rekisitonan basiko di kalidat. Tur informashon relevante mester ta disponibel, kompleto, aktualisá i aksesibel di un manera konfiabel pa e sistema di HAP. Ku otro palabra; un HIS alternativo mester por ta funshonal i kompatibel. Ta di sumo importansia ku HAP ta disponé di tur e informashon nesesario di pashènt pa por duna un kuido responsabel i adekuá. 

Opinion preliminar di FTAC

FTAC a pone den su ‘beschikking’ preliminar ku nan no ta haña irasonabel ku HAP ta eksihí ku ta hasi uso di un HIS pa por interkambiá informashon di pashènt den su akuerdo di registrashon. Sinembargo FTAC ta di opinion ku e kondishon ku tin pará den e akuerdo di registrashon, ku mester hasi uso di e sistema di HAP (SQLapius) ta kontra Ordenansa di Lei riba reglanan di kompetensia (Landsverordening inzake concurrentie). 

Segun FTAC HAP por kita e violashon di lei aki dor di krea e posibilidat ku HAP ta hasi posibel pa realisá traspaso di informashon entre e sistema di HAP i sistema alternativo ku un dòkter di kas por tin.  

FTAC ta di opinion ku di e forma aki, dòkternan di kas ku ta hasi uso di un sistema di informashon alternativo, riba nan propio gastu, por laga adaptá e sistema aki, di moda ku por hasi un konekshon via un API ku e sistema di HAP. Pa esaki HAP mester pone e informashon nesesario na disposishon gratuitamente. Ta responsabilidat di e dòkter di kas pa sòru ku e informashon di pashènt ku e ta kompartí, ta kompleto i aktualisá. 

Ainda no tin un desishon definitivo di FTAC. Interesadonan tin algun siman di tempu pa presentá nan opinion serka FTAC, promé ku e organisashon tuma un desishon definitivo.  

Reakshon di HAP

For di 2024 HAP a informá e dòkternan di kas en kestion ku e ta dispuesto pa traha huntu ku e dòkternan ku ta usa un otro HIS for di SQLapius. HAP ta para habrí pa konektá via API's, basta e dòkternan mes ta realisá esakinan i ta paga nan. FTAC a indiká esaki tambe den su desishon preliminar. 

Lástimante e dòkternan no kier a hasi uso di e posibilidat aki ku a ofresé nan pasobra nan ta di opinion ku HAP mester kubri e gastunan di e konekshon di API di nan banda. Awor ku ta resultá ku esaki di akuerdo ku e desishon preliminar di FTAC no ta na nodi, HAP ta spera ku esaki ta habri kaminda pa un koperashon konstruktivo i ku e kuater dòkternan di kas ku tin un HIS alternativo lo registrá serka HAP via un konekshon API. 

Esaki ta nifiká ku aktualmente tin tres dòkter di kas ku no tin un HIS (entretantu un di e dòkternan aki a bai ku penshun) i ku no por registrá serka HAP tanten ku nan no sòru pa un sistema digital ku por konektá ku esun di HAP, i ku tin kuater dòkter di kas, ku ta hasi uso di un otro HIS i ku ainda por registrá serka HAP, basta nan kumpli ku e kondishon di dokumentashon digitalisá kompleto i aktualisá ku por sòru pa un konekshon API korekto i sigur ku SQLapius. 

HAP ta kontentu di por informá ku aktualmente kasi 90 dòkter di kas ta partisipando eksitosamente na e modelo di kuido konhunto di Huisartsenpost na Kòrsou.