Desishon final di FTAC ta konfirmá aktuashon legítimo di Huisartsenpost (HAP)

Keho na FTAC

Na ougùstùs 2024, un grupo di 8 dòkter di kas ku no ta afiliá na huisartsenpost (HAP), a entregá un keho na Fair Trade Authority Curaçao (FTAC). E keho ta trata un kondishon den e akuerdo di afiliashon di HAP. Den esaki tin poné ku dòkternan di kas afiliá, mester hasi uso di e ‘huisartsinformatiesysteem’ (HIS) di SQLapius pa por haña akseso na e servisionan di HAP. Pero mayoria di e dòkternan di kas no afiliá aki, no ta hasi uso di un HIS, pero ta traha ku papel ku pèn.

Importansia di un HIS pa HAP

Pa HAP ta esensial pa por tin akseso na sierto informashon, manera e historial médiko relevante, alergia i uso di remedi, pa medio di e ‘patiëntendossiers’ di e dòkternan di kas afiliá na HAP. Esaki ta nesesario pa por trata e pashèntnan ku bini HAP di forma adekuá. Banda di esei, ta di suma importansia ku na momentu ku un pashènt keda tratá na HAP, e dòkter di kas di e pashènt keda informá inmediatamente pa medio di un sistema digital konfiabel. Di e manera aki e dòkter di kas ta keda semper na altura di e ultimo situashon médiko di su pashènt.

Desishon FTAC

Mientrastantu FTAC a publiká su desishon definitivo. Konklushonan prinsipal ta:

1. FTAC ta rekonosé ku uso di un HIS ta un eksigensia di kalidat i ta esensial pa un bon kuido i traspaso konfiabel di informashon di pahsènt. Sin un HIS un koperashon responsabel ku HAP ta imposibel.

2. Ta hustifiká pa HAP inkluí kondishonnan tokante e manera ku ta traspasá informashon di pashènt, den su akuerdo di afiliashon.

3. E eksigensia pa usa eksklusivamente e HIS di SQLapius ta bai muchu leu. FTAC ta determiná ku mester por ta posibel pa krea konekshon via otro tipo di HIS, basta esaki ta kumpli ku standart internashonal i por traspasá informashon via un asina yamá konekshon-API, di un forma sigur i kompletu ku e sistema di HAP. 

4. Gastunan di un konekshon asina ta bin hustifikadamente pa e dòkter di kas. HAP mester pone si e informashon tékniko nesesario disponibel di forma gratuito.

Reakshon di HAP 

HAP ta kontentu ku FTAC a afirmá ku uso di un HIS ta indispensabel pa un kuido médiko di dòkter di kas responsabel, i ku e kondishonan den e kontrato di afiliashon ta hustifiká. HAP ta enfatisá ku semper e tabata dispuesto pa traha huntu ku e dòkternan di kas ku tin un otro tipo di HIS, basta esaki ta kumpli ku e eksgensia tékniko i kualitativo i nan mes ta sòru pa e konekshon-API. HAP lo inkluí esaki eksplisitamente den su kontrato di afiliashon ku dòkternan di kas. 

Konsekuensianan práktiko

E verediko di FTAC ta krea un kuadro kla:

1. Dòkter di kas ku no tin un HIS, no por afiliá. 

2. Dòkter di kas ku tin un otro tipo di HIS por afiliá, basta nan tin un sistema ku ta kumpli ku e standart i nan por realisá un konekshon-API riba nan propio gastu.

Konkretamente esaki ta nifiká ku na e momentunan aki tin mas o menos 3 dòkter di kas ku por afiliá ainda serka HAP, basta nan kumpli ku e kondishon di dokumentashon digital kompleto i aktualisá, i basta nan sòru pa un konekshon-API korekto i konfiabel ku SQLapius.

Aktualmente tin mas ku 90 dòkter di kas ku ta afiliá na HAP i tin miles di pashènt na Kòrsou ku ta risibí kuido médiko di kalidat haltu den oranan di atardi/anochi i den wikènt.   

Antesedente

Ora a kuminsá ku e servisio di HAP na yanüari 2024, a skohe konsientemente pa usa e sistema di SQLapius, ku na e momentu ey ya tabata wòrdu usá pa mas ku 90% di dòkternan di kas, i otro provedornan di kuido, manera laboratorium, botika, SVB i CMC i ku tabata hasi traspaso di informashon di pashènt di un forma konfiabel i pagabel. Pa e motibu aki uso di SQLapius a bira un kondishon pa por a afiliá na HAP. 

E dòkternan di kas ku tabata reklamá, no kier a hasi uso di SQLapius i no kier a invertí den un HIS ni konekshon-API pa nan propio sistemanan. HAP a trata di forma aktivo pa yega na un solushon ku nan, pero esei no a resultá posibel. HAP por aseptá sistemanan alternativo solamente si nan ta kumpli ku eksigensianan di kalidat ku ta nesesario pa garantisá un kuido sigur i responsabel.

HAP ta sigui duna su kontribushon pa yega na un bon koperashon i uniformidat i pa garantisá kuido médiko di dòkter di kas konfiabel i aksesibel pa pueblo di Kòrsou.